facebook instagram youtube
  • Arantxa Zapirain Oiarzabali eman diogu 2023ko Amalur saria

    Hunkigarria izan da benetan gaur eguerdian Oiartzungo Pleno Aretoan egin dugun aurtengo Amalur sarien ekitaldia. Amets Ladislaok eman dio sari-banaketari kontestua Emakume Baserritarren gogoeten bidez.

    Ametsek argi esan du eredu agroekologikoa dela dugun itxaropen bakarra bizirauteko eta egungo eredua iraultzeko,ekoizpen txikia, justua eta anitza. 90. hamarkadako industrializazioan emakumeek zuten gizarteratzeari esker iraun du gaur egun arte eredu agroekologikoak. Arantxa belaunaldi hortako emakumea dugu. Bizitza bat baratzea horixe Arantxa laburbiltzeko hiru hitz.

    Irribarreak, malkoak, barre-algarak,… denetik izan ditugu ordubeteko saioan, baina poztasuna eta harrotasuna sentitu ditugu Arantxa bezalako pertsona xume eta langileari merezitako omenaldia egitera bildu garenok. Sentitua izan da benetan aitortza. Baietz hunkitu zeu ere Elikako kideen mezuak!!

    Saioari amaiera emateko ekitaldian kantatu ditugun bertsoek ongi islatzen dute omendu nahi izan duguna:

    Emakumea ta lurra

    konbinazio xamurra

    emankortasun hortatik dator

    daukagun apurra.

    Hartuko dugu ardura

    burujabetza gailurra

    zuk erakutsi diguzu nola

    dantzatu atxurra.

    ————————————————————————-

    Bihotz bat eta bi esku,

    beti lanerako prestu,

    irribarre ta hitz goxoekin

    emateko gertu.

    Komunitatea estu

    zure baitara babestu

    Arantxa baino hazi hoberik

    gure lurrak ez du!!!

    (Mendian gora haritzaren doinuan)

    Hemen duzue omenaldian zehar ateratako argazkien bilduma:

    Eskualdeko hedabideetan oihartzuna izan zuen martxoaren hasieran eman genuen Amalur Sariak eta aurretik Amets Ladislaok emaniko hitzaldiak. Ez galdu honako erreportaje hau.

    Eskerrik asko aurtengo edizioa prestatzen aritu zareten Laborezain bolondres guztiei!!