Pasa den ostegunean Elizalde Herri Eskolako DBH-3 mailako ikasleak izan genituen bisitan bai Laboren eta baita Elikan ere. Argi geratu zitzaien azalera handiek inposatzen diguten ereduak baduela alternatiba eta egingarria dela gainera. Oso saio dinamikoak izan ziren, galdera mordoa egin baitziguten, bisitak interesa piztu zien seinale. Polita iruditzen zaigu haiengan sortzen dugun harridura eta kuriositatea eta nola piskanaka konturatzen diren kapitalismoak ezarritako ereduak nolako atzaparrak dituen baina era berean ez dela egiteko modu posible bakarra.
Aurrena Elikako baratzak bisitatu zituzten eta bertan Jonen azalpenak adi entzun zituzten eta ondoren elikaduraren katean hurrengo katebegia den Laboreren dendara etorri ziren. Azalpen teorikoaren ondoren, esandakoak haien begiekin egiaztatu ahal izaten zituzten denda barruko bisita gidatuan.
Kontsumo kultura berria sortzeko ezinbestekoa iruditzen zaigu pedagogia egitea, etortzen diren guztien artetik baten baten barnean haziren bat ereitea lortzen badugu, merezi izango du beti.