Duela egun batzuk gurean izan genituen Koloreko proiektuko osaba ilobak. Hasiera batean langileontzako formakuntza gisa planteatu genuen saioa, zuei ahalik eta ondoen aholkatzeko asmoz. Baina zuetako batzuen interesa ikusita, saio irekia egitea erabaki genuen azkenean.
Tinte natural ekologikoen munduan sartzera zerk eraman zituen azaltzeaz gain, tinteen mundua bera, pigmentudun landareak, osasuna, edertasuna eta beste hainbat gai izan genituen hizpide. Pasioz bizi dute gaia baina baita gure buruari agresiorik ez eragiteko moduko produktuak ekoizteko betebeharretik ere. Esan digutenez ileapaindegietan ezezagutza asko dagoenez gaiaren inguruan, pedagogia egiten ari dira piskanaka. Izan ere, tinte kimikoen bidez gure gorputzean toxiko andana sartzen ari gara. Garbiñe Larreak joan den astean emandako hitzaldia Kolorekoko kideekin osatu genuen, kosmetikaren gaia integralki landuz. Kontutan izan behar dugu tinte kimikoak erabiltzean ez garela soilik geure burua kutsatzen ari baizik eta baita ura ere, ezin dugu ostrukarena egin eta beste aldera begiratu gure arduraren aurrean.
Kolorekoko tinteak haien formulazio propioari jarraiki landareen nahasketarekin naturalki elaboratzen dituzte India iparraldeko desertuan kokatuta dagoen eta langileen eskubide eta onura sozialak mimoz zaintzen diren lantegian.
Tinte kimikoetatik naturaletara pasatzean ilea aurrena toxikoetatik garbitu eta indartzea garrantzitsua denez, atzoko saioaren ostean landare tratamentu neutrala ere eskuratu dugu, pigmenturik aplikatu gabe ilea indartu eta bolumena eta dizdira emateko. Duo paketeez gain, pare bat aurre kolore ekarri ditugu solte zuen konbinazioa ere egiteko aukera izan dezazuen. Adi entzun genituen haien azalpenak zuen galderak erantzuteko gai izan gaitezen. Hala ere, harreman zuzena dugu Oihanarekin kontsulta zehatzagoak baldin badituzue, behar bezala aholkatzeko. Gainera, haien webgunean doako diagnostikoa ere eskaintzen dute, jakin dezazuen zein tratamentu edo kolore nahasketa den egokiena zuentzat.
Oso pozik gaude Kolorekoren tinte hauekin ere zuen osasuna zaintzeko urrats garrantzitsua egin dugulako. Guztion zaintza eta osasuna baitugu egunerokoan erdigunean!!
